Seminari “Kërkimi i bazuar në programet e mësimdhënies së mësuesve - Një rrugë e re për përmirësimin e kurrikulës për mësuesit e ardhshëm”, që u zhvillua në Universitetin e Shkodrës “Luigj Gurakuqi”, është një nismë që përkrah reformën arsimore në Shqipëri duke rritur dhe përforcuar kapacitetet e pedagogëve dhe nivelin e tyre të mësimdhënies. Kjo veprimtari u bë e mundur në sajë të bashkëpunimit të zyrës së TEMPUS-it në Tiranë dhe universitetit tonë.

Seminari që u organizua me mbështetjen financiare të Komisionit Evropian dhe të Ministrisë së Arsimit dhe Shkencës, mblodhi së bashku anëtarë të stafit akademik të Universitetit të Shkodrës, përfaqësues nga universitetet e Tiranës, Korçës, Gjirokastrës, Elbasanit dhe Vlorës. Takimi u fokusua në risitë dhe sfidat e reformës së mësimdhënies, si dhe në përvojat evropiane në këtë proces.

Duke hapur këtë takim Rektori i Universitetit të Shkodrës “Luigj Gurakuqi”, prof. dr. Artan Haxhi u shpreh se qëllimi i këtij seminari që po organizohet sot është mjaft fisnik, pasi i shërben edhe promovimit të reformave të arsimit të lartë. Temat e zgjedhura nga kumtuesit janë shumë të rëndësishme.

Ministri i Arsimit dhe Shkencës, prof. dr. Myqerem Tafaj duke u ndalur tek reformat në arsim theksoi se reformat në mësimdhënie janë me rëndësi për të gjithë sistemin e arsimit. “Kjo reformë është përcaktuese për përmbajtjen e arsimit e modernizon metodologjinë e mësimdhënies dhe ka vlerë edhe për profesorët e universiteteve. Ne duhet të kthehemi tek sistemi solid ndërdisiplinor si faktor parësor që ka të bëjë me formimin e nxënësve dhe të studentëve. Duhet të ndjekim modele të suksesshme dhe të prodhojmë kurrikula të përshtatshme për ne. TEMPUS është një mundësi shumë e madhe për të gjetur partner në bashkëpunim”. Më tej ministri Tafaj vuri në dukje se universitetet duhet të zhvillojnë struktura të reja për trajnimin e mësuesve. Ai u ndal edhe te domosdoshmëria e bashkëpunimit ndërkombëtar në fushën e mësuesisë.

Z. Bardhyl Musai, këshilltar i kryeministrit referoi kumtesën “Ristrukturimi i programeve të përgatitjes së mësuesve në përgjigje të kërkesave të shoqërisë së dijes”. Ai përcaktoi si parime kryesore të përgatitjes së mësuesve: dije të freskëta nga hulumtimet më të përparuara në fushën ku ata përgatiten; rezultate të hulumtimeve të sotme për të nxënët dhe mësimdhënien; profesioni i mësuesit të jetë i mbështetur në hulumtim.

Znj. Edit Dibra, koordinatore e programit “Tempus” falënderoi rektorin e Universitetit të Shkodrës prof. dr. Artan Haxhi, që hapi dyert për punimet e këtij seminari. “Projektet TEMPUS janë rrekur herë pas here në mënyrë të drejtpërdrejtë ose tangente të trajtojnë çështje që lidhen me trajnimin fillestar dhe të vazhduar të mësuesve. Në takimin e sotëm është rasti të shkëmbejmë dhe ndërrojmë ide për këtë temë të rëndësishme”. Folësja ftoi pedagogen e Universitetit të Helsinkit znj.Taina Kaivola për të paraqitur modelin finlandez si një nga modelet më të suksesshme të mësimdhënies. Në prezantimin e saj znj.Taina Kaivola u ndal tek kërkimi i bazuar në teori dhe praktikë. Kurrikula e modelit finlandez është e orientuar drejt kërkimit. Ajo trajtoi shembuj nga Universiteti i Helsinkit. Efekti i trajnimit pedagogjik  në mësimdhënien e mësuesve, përdorimi i një instrumenti kërkues për të zhvilluar cilësinë në universitet, si dhe aspekti hulumtues i studentëve.

Seminari vazhdoi sipas programit të mëposhtëm:

Programi i seminarit

“ Kërkim i bazuar në programet e mësimdhënies së mësuesve - Një rrugë e re për  përmirësimin e  kurrikulës për mësuesit e ardhshëm”.

Ora: 09:30- 10:00                        Hapja e seminarit

Fjalimet përshëndetëse:

 Z. Artan Haxhi,  Rektor i  Universitetit  të  Shkodrës  “Luigj Gurakuqi”.

 Z. Myqerem Tafaj, Ministër i Arsimit dhe Shkencës.  

 Znj. Edit Dibra, koordinatore lokale e programit “Tempus”.

10:00-10:30 “Ristrukturimi i programeve të përgatitjes së mësuesve në përgjigje të kërkesave të shoqërisë së dijes” nga z. Bardhyl Musai, Albanian HERE.

10:30-11:15 “Prezantim mbi suksesin e modelit finlandez; Kërkim i bazuar në programet e mësimdhënies së mësuesve” nga znj.Taina Kaivola, eksperte evropiane, profesoreshë në Universitetin e Helsinkit, Finlandë.

11:30-12:00 “Pajisja e mësuesve të rinj me aftësitë e duhura për shoqërinë e dijes”, nga znj. Ema Kristo, Universiteti i Elbasanit. 

12:00-12:30 “Qendra për përsosjen e mënyrave të mësimdhënies - një nevojë për mësuesit, duke përfshirë këtu edhe mësuesit e ardhshëm” nga z. Ali Jashari, Universiteti i Korçës.

12:30-13:30  Forum i hapur: diskutime, pyetje dhe  konkluzione.