Në sallën e Bibliotekës Shkencore të Universitetit të Shkodrës “Luigj Gurakuqi”, Departamenti i Infermierisë organizoi më 11.07.2012 një ceremoni me rastin e diplomimit të studentëve.  Duke hapur ceremoninë  përgjegjësi i Departamentit të Infermierisë, Julian Kraja theksoi se  sot  ju po kurorëzoni frytet e punës tuaj studimore.

Në përshëndetjen e saj pedagogia Drita Gera u shpreh se është kënaqësi që merr pjesë në këtë  ceremoni, e cila përkon me 10-vjetorin e hapjes së kësaj dege. “Ju tashmë keni një profesion, por keni edhe një mision të madh, sepse ju shpëtoni jetë njerëzish”, përfundoi folësja.

Në emër të studentëve përshëndeti Dario Bello, i cili në fjalën e tij falënderoi prindërit për sakrificat, ndërsa pedagogët e USH-së dhe infermierët e spitalit rajonal Shkodër për përkushtimin e lartë profesional në dhënien e dijeve.  Studenti theksoi se fjala infermier do të thotë në etimologjinë e saj i pandalshëm dhe i palodhur. “Ne jemi ata që po vrapojmë të shpëtojmë jetët e njerëzve. Me thjeshtësinë, etikën dhe kodin tonë do të dimë të qëndrojmë afër pacientëve dhe familjarëve të tyre”.

Falënderime për stafin akademik erdhën mes emocionesh të veçanta edhe nga studentet: Arminda Pelingu, Klesta Piranej dhe Nikoleta Prekducaj. Më tej aktiviteti vazhdoi me leximin e tekstit të betimit “Premtimi Florence Nightingale për infermierët”.

Në këtë ceremoni u diplomuan 57 studentë në degën infermieri e përgjithshme dhe 33 infermieri mami. Për studentët më të dalluar u dhuruan stetoskopë.  Veprimtaria u përcoll me shumë emocion nga pedagogët pjesëmarrës dhe prindërit e studentëve.

Hapja e degës së studimit “Infermieri e përgjithshme” u bë e mundur në vitin akademik 2000-2001. Në atë vit filluan studimet 50 studentë. Për hapjen e këtij programi studimi ndikoi bashkëpunimi i Universitetit “Luigj Gurakuqi” me rrjetin spitalor dhe strukturat e tjera shëndetësore të Shkodrës. Vlen të theksohet mbështetja e Universitetit Infermieristik të Grand Valley në Miçigan. Ishte bashkëpunimi i profesorëve të këtij universiteti, të cilët mundësuan aplikimin e programeve të studimit të një niveli bashkëkohor, si dhe të teknikave të reja në fushën e klinikës mjekësore. Aktualisht dega e infermierisë lëshon diploma për infermier i përgjithshëm, infermier mami dhe fizioterapi. Programi i studimit për fizioterapi u hap në vitin 2007 në sajë të një partneriteti të ngushtë me Universitetin e Firences.