Ceremonia e diplomimit të studentëve të Fakultetit Ekonomik u zhvillua në një atmosferë shumë festive në Teatrin “Migjeni”. Në këtë veprimtari merrnin pjesë përfaqësuesit më të lartë të universitetit tonë, pedagogë, autoritete vendore dhe familjarë të studentëve.  Pas një inserti filmik me çastet më të bukura nga jeta studentore, pedagogia Kleida Tufi ia dha fjalën Rektorit të Universitetit të Shkodrës “Luigj Gurakuqi”, prof. dr. Artan Haxhi.

Mes emocionesh të veçanta rektori Haxhi u shpreh: “Ju sot i dhuroni vetes një kënaqësi dhe krenari të ligjshme. Ne synuam t’ju pajisim me dije dhe njohuri bashkëkohore. Urojmë dhe besojmë që kësaj t’ia kemi arritur. Ju me punën tuaj keni treguar se prisni shumë prej vetes. Ne urojmë të vazhdoni të jeni këmbëngulës. I gëzofshi diplomat! Suksese dhe mbarësi në jetën dhe punën tuaj!”

Dekania e Fakultetit Ekonomik, prof. dr. Arjeta Troshani, përcolli urimet më të sinqerta nga gjithë stafi i këtij fakulteti. “Ju uroj suksese në punësimin tuaj sa më të shpejtë, pasi kjo do të jetë kërkesa e parë, që ju do të keni ndaj vetes, por dhe dëshira e familjarëve tuaj. Nga vëzhgimet që kemi bërë në tregun e punës, studentët tanë po punësohen ende pa e marrë diplomën Bachelor. Kjo është një pikë e fortë e diplomës sonë, por edhe rezultat i punës që ne kemi bërë në organizimin e panaireve të punës, si dhe në krijimin e Zyrës së Këshillimit dhe të Karrierës, nëpërmjet së cilës përpiqemi të mbajmë lidhje direkte me bizneset, institucionet dhe operatorët ekonomikë, që mund të sigurojnë punësimin e studentëve tanë.”

Këtë vit akademik u diplomuan në degët Financë-Kontabilitet 62 studentë, Administrim-Biznes 34 studentë dhe në Marketing-Turizëm 33 studentë. Studentët më të dalluar: Irida Haxhi, Gyzeila Piroviq, Kristina Zojza, Sead Baraku, Dritan Paçe, në fjalët e tyre përshëndetëse shprehen falënderime të veçanta për stafin pedagogjik dhe për familjet që janë përkujdesur aq shumë për ta.

Hapja e degës së administrim-biznesit në vitin 1992 shënoi lindjen e Fakultetit Ekonomik. Që në atë kohë kjo degë u konceptua sipas modeleve të fakulteteve amerikane. Planet e  programet mësimore, tekstet dhe metodat e mësimdhënies  ishin shumë të përparuara.  Në vitin 1996 dega e administrim-biznesit u emërtua Fakulteti Ekonomik dhe shumë shpejt u bë zgjerimi me dy degë të reja: Financë-Kontabilitet dhe Marketing-Turizëm. Aktualisht ky fakultet ofron katër mastera shkencorë dhe është në procedurë aplikimi pranë Ministrisë së Arsimit dhe të Shkencës për hapjen e tre masterave profesionalë. Fakulteti Ekonomik është shndërruar në një nga aktorët kryesorë të marrëdhënieve të partneritetit me universitete të njohura evropiane e më gjerë, si dhe bashkëpunon ngushtësisht me projektin TEMPUS.

Ceremonia përfundoi me shpërndarjen e diplomave, si dhe me ritualin e hedhjes së kapeleve.