29 korrik 2010.

Fakulteti Juridik: Ceremonia e shpërndarjes së diplomave


Mbas përfundimit të vitit akademik 2009-2010, Fakulteti Juridik organizoi Ceremoninë e diplomimit të studentëve, që përfunduan studimet gjatë këtij viti.       Të pranishëm në këtë ceremoni ishin : Kryetarja e Kuvendit të  Shqipërisë Znj. Jozefina Topalli, Ministri i Arsimit dhe Shkencës Z. Myqerem Tafaj, drejtuesit e Universitetit të Shkodrës si dhe krerët më të lartë të pushtetit lokal dhe vendor.  Në fjalën e hapjes dekani i këtij fakulteti Z. Gaspër Koka ndër të tjera u shpreh se “Kjo është  një ditë e veçantë jo vetëm për studentët të cilët sot  kurorëzojnë dhe bëjnë realitet një ëndërr të madhe por edhe për stafin akademik që gjatë këtij viti u përkushtua për të arritur më të mirën e mundshme, duke u përpjekur në hartimin e kurrikulave të plota dhe  bashkëkohore. Aplikimi i sitemit të ri dhe stafi i kualifikuar brenda dhe jashtë vendit , mundësuan që fakulteti Juridik i Shkodrës të përshtatet shumë shpejt me të rejat dhe të mirat e sistemit të ri të Bolonjës. Studentët mund të ndjekin  edhe Nivelin e dytë të studimeve në dy drejtime " E drejtë private dhe e biznesit ” si dhe " E drejtë kushtetuese dhe Administrative".   Këta të rinj  do ti bashkohen mijëra  të rinjve të tjerë shqiptarë, të diplomuar si juristë, avokatë dhe ekspertë të së drejtës ligjore në Shqipëri. Këtë ceremoni e përshëndeti edhe Ministri i Arsimit dhe Shkencës Z. Myqerem Tafaj i cili gjeti me vënd të falënderoj studentët për punën shpesh herë me sakrifica dhe lodhje por me një falenderim të veçantë iu drejtua  prindërve shqiptar, të cilët ruajnë traditën e mirë të interesimit dhe përkujdesjes së vazhdueshme për fëmijët e tyre. Më pas ministri Tafaj  theksoi: Punën dhe kontributin e këtij Fakulteti në shërbim të zhvillimit dhe të integrimit  rajonal dhe më gjërë.
Kryetarja e Kuvendit zonja Jozefina Topalli, me një emocion të veçantë, i uroi studentët, stafin akademik dhe prindërit, për këtë ditë të jashtëzakonshme dhe të paharrueshme, në  jetën e tyre. “Është nder të jem mes jush, për të falënderuar pedagogët, por edhe të gjithëve ju të rinjve që jeni në këtë ceremoni. E di që jeni lodhur në këto vite, jeni përpjekur,  por sot ja keni dalë me sukses dhe e shoh që jeni të lumtur. Duhet të keni kurajo, duhet të keni guxim në këtë rrugë sa të vështirë aq edhe të bukur. Rruga e vështirë është edhe më e bukur.” Kryetarja e Kuvendit theksoi se: Arsimimi dhe edukimi i të rinjve për një karrierë të suksesshme të tyre mbetet prioritet i qeverisë dhe i reformave ligjore në Parlament. Unë besoj se Ju do të jeni mbrojtësit më të mëdhenj të ligjit. Ju do të jeni garanti i së drejtës.”
Më pas në emër të studentëve përshëndeti znj. Iris Topalli, e cila mori diplomën”Student i Shkëlqyer”.